P 422291

Cylinder :

Surface A :

1. {disz}{d}en#-[...] _lugal#_ dan-nu _lugal kur_ asz-szur{ki} _lugal_ la sza2-na-an _re-e2-um_ mut-nen-nu-u2 pa-lih _dingir-mesz gal-mesz_

2. na-s,ir# [...] e#-pisz u2-sa-a-ti a-lik tap-pu-ut a-ki-i sa-hi-ru dam-qa-a-ti

3. et,-lum# [...]-red# kal ma-al-ki rap-pu la-'i-it, la ma-gi-ri mu-szab-ri-qu za-ma-a-ni

4. {d}[...]-li-ma-an-ni-ma _ugu_ gi-mir a-szib pa-rak-ki u2-szar-ba-a _{gesz}tukul-mesz_-ia

5. i#-[...]-szi#-bu-ma ba-hu-la-a-te _kur_ asz-szur{ki} u2-ma-'e-ru i-na tasz-me-e u3 sa-li-me

6. {disz}{d#}[...]-nu# ba-ra-nu-u2 ka-rasz sur-ra-a-ti e-pisz le-mut-ti sza an-zil-la-szu kit#-tu

7. {disz}szu#-[...] is-hur-ma _ku3-sig17 ku3-babbar_ ni-siq-ti _na4-mesz_ u2-szat-lim-szu-ma e-ter-ri-su kit#-ru

8. {disz}im-ba#-[...] ta#-an-na-a-nu _{lu2}3(disz)-u5_ 1(u) _{lu2}gal ki-s,ir-mesz_ a-di {disz}{d}u-gur-na-s,ir {lu2}su-tu-u2 la a-di-ru ta-ha-zu

9. 1(gesz2) 2(u) _lim_ {lu2}[...] _ansze#-kur-ra-mesz_ it-ti szu2-nu-ti-ma a-na _kur eme-gi7_ u3 uri{ki} isz-pu-ra re-s,u#-[x]-su#

10. u3 szu-u2# [...] ararma#{ki} uri2{ki} eridu{ki} kul-aba4{ki} ki-is-sik#{ki#} {iri}ne2-med-{d}la#-[x]-da

11. {kur}e2-{disz}ia#-[...]-al#-li {kur}e2-{disz}dak-ku-ri si-hir-ti {lu2#}kal-di ma-la ba-szu-u2#

12. sza _gu2_ {i7#}[...] ia#-daq-qu {lu2}gib-re-e {lu2#}ma#-li#-hu

13. sza _gu2_ {i7#}[...]-nu# {lu2}gam-bu-lu {lu2}hi-in-da-ru {lu2}ru-'u-u-a {lu2#}pu#-qu#-du

14. sza _gu2_ {i7#}[...] {lu2}na-ba-tu2 {lu2}li-i'-ta-a-u2 {lu2}a-ra-mu la kan-szu sza2 la i-du#?-u2# mi-tu#?-tum

15. nibru{ki} dil-bat# babila2#{ki} bar2-sipa{ki} gu2-du8-a{ki} gi-mir {kur}kar2-dun-ia-asz2 isz-te-nisz u2-pa-hir-[x x]-szak#-s,ir ta#-ha-zu

16. ia-a-ti {disz#}{d#}en#-zu#-szesz#-mesz-eri-ba# zi#?-kar#? _edin#?_ na-a'-du# ep-sze-ti-szu2 lem-ne2-e-ti u2-sza2-an-nu-nim-ma la-ab-bisz an-na-dir-ma qe2-reb babila2{ki} a-na# [x]-ri-szu aq-t,i-bi# a-la-ku

17. szu-u2 hi-ri-is, gal-le-e lem-ni a-lak ger-ri-ia isz-me-ma _ansze-kur-ra-mesz erin2-mesz {gesz}pan_ {lu2}a-la-mu-u2 {lu2}a-ra-mu {lu2}kal-du it-ti {disz}{d}u-gur-na-s,ir u3 1(u) _{lu2}gal ki-s,ir-[x_ x] {kur}elam-ma{ki} sza2# la# i-du mi-tu#-tu2

18. e-mu-qi2 la ni-bi it-ti szu2-nu-ti-ma u2-dan-ni-in ki-is,-ri-szu2-un qe2-reb gu2-du8-a{ki} isz-te-nisz u2-sze-rib-ma a-na me-te-eq ger-ri-ia u2-sza2-an-s,ir# ka#-a-du#

19. s,i-in-di-ia usz-te-sze-ra _ud-2(u)-kam2_ sza {iti}ziz2 ul-tu bal-til{ki} _gin7_ {gu4}_am_ gap-szi meh#-ret _erin2 hi-a_-ia as,-bat-ma pa-an gi-ip-szi-ia ul u2-szad-gil#-ma# ar-ka#-a ul u2#-qi2

20. _{lu2}gal sag {lu2}en-nam-mesz_-ia a-na kisz{ki} u2-ma-'e-er mah-ru-u-a u2-ru-uh {disz}{d}marduk-ibila-szum2-na s,ab-ta-a-ma e te-ga-a dun-ni-na ma-s,ar-tusz

21. szu-u2 _{lu2}en-nam-mesz_-ia e-mur-ma a-di gi-mir el-la-ti-szu2 _ka2-gal_ {d}za-ba4-ba4 us,-s,a-am-ma i-na ta-mir-ti kisz{ki} it-ti _{lu2}gal-mesz_-ia e-pu-usz ta-ha-zu

22. _{lu2}gal-mesz_-ia qit-ru-ub ta-ha-zi _{lu2}kur2 ugu_-szu2-un id-nin-ma ul i-le-'u-u2 ma-ha-ar-szu _{lu2#}a_ szip-ri-szu2-un sza ha-mat i-na qe2-reb ta-mir-ti gu2-du8-a{ki} s,e-ru-u-a isz-pu-ru-u-ni

23. i-na ug-gat lib3-bi-ia _ugu_ gu2-du8-a{ki} ti-bu szam-ru asz2-kun-ma {lu2}mun-dah-s,i sa-hi-ir _bad3_-szu2 as#-li-isz u2-t,eb-bi-ih-ma as,-s,a-bat _iri_

24. _ansze-kur-ra-mesz erin2-mesz {gesz}pan_ {lu2}e-la-me-e {lu2}a-ra-mu {lu2}kal-du _{lu2}gal ki-s,ir-mesz_ {lu2}{kur}elam-ma{ki} u3 {disz}{d}u-gur-na-s,ir a-di _dumu-mesz iri en_ hi-it,-t,i u2-sze-s,a-am-ma szal-la-ti-isz am-nu

25. la-ab-bisz an-na-dir-ma al-la-bi-ib a-bu-bi-isz it-ti {lu2}qu-ra-di-ia la ga-me-lu-ti s,e-risz {disz}{d}marduk-ibila-szum2-na a-na kisz{ki} asz2-ta-kan pa-ni-ia

26. u3 szu-u2 e-pisz lem-ne2-e-ti a-ka-mu ger-ri-ia a-na ru-qe2-e-ti e-mur-ma im-qu-su hat-tu gi-mir el-la-ti-szu2 e-zib-ma a-na {kur}gu-zu-um-ma-ni in-na-bit

27. {disz}ta-an-na-a-nu a-di um-ma-na-at {lu2}elam-ma{ki} {lu2}kal-du u3 {lu2}a-ra-mu sza i-da-a-szu iz-zi-zu-ma il-li-ku re-s,u-us-su _bad5-bad5_-szu2-un asz2-kun-ma u2-par-ri-ir el-lat-su

28. {disz}a-di-nu _dumu nin?_ {disz}{d}marduk-ibila-szum2-na a-di {disz}ba-as-qa-a-nu _szesz_ {munus}ia-ti-i'-e szar-rat {lu2}a-ri-bi it-ti um-ma-na-te-szu2-nu bal-t,u-su-un ina qa-ti as,-bat

29. _{gesz}gigir-mesz_ {gesz}s,u-um-bi _ansze-kur-ra-mesz {ansze}kunga-mesz ansze-mesz <<disz>> ansze-a-ab-ba-mesz_ {ansze}ud-ri sza qe2-reb tam-ha-ri musz-szu-ru ik-szu-da _szu-min_-a-a

30. i-na hu-ud lib3-bi u3 nu-um-mur pa-ni a-na babila2{ki} a-hi-isz-ma a-na _e2-gal_ {disz}{d}marduk-ibila-szum2-na asz2-szu pa-qad _nig2-szu_ u3 _nig2-gur11_ qe2-reb-sza2 e-ru-ub

31. ap-te-e-ma _e2_ ni-s,ir-te-szu2 _ku3-sig17 ku3-babbar_ u2-nu-ut _ku3-sig17 ku3-babbar na4-mesz_ a-qar-tu2 _{gesz}na2-mesz {gesz}gu-za-mesz_ ne2-me-di {gesz}sza2 sza2-da-di {gesz}ga-szi-ru-ut _lugal_-ti-szu2 sza2 ih-zu-szu2-nu _ku3-sig17 ku3-babbar_

32. mim-ma szum-szu _nig2-szu nig2-gur11_ la ni-bi ni-s,ir-tum ka-bit-tum _dam_-su {munus}_ug3-mesz e2-gal_-szu2 _munus-agrig-mesz_ {lu2}szu-ut _sag-mesz {lu2}tirum-mesz_ {lu2}man-za-az pa-ni _{lu2}nar-mesz_ {munus}_nar-mesz_

33. _{lu2}ARAD2-mesz e2-gal_ mu-nam-mi-ru t,e3-mu ru-bu-ti-szu2 si-hi-ir-ti um-ma-a-ni ma-la ba-szu-u2 mut-tab-bi-lu-tu2 _e2-gal_-szu2 u2-sze-s,a-am-ma szal-la-ti-isz am-nu

34. ur-ri-ih-ma _egir_-szu2 a-na {kur}gu-zu-um-ma-ni {lu2}mun-dah-s,i-ia a-na qe2-reb {i7}a-gam-me u3 ap-pa-ra-a-ti u2-ma-'e-er-ma 5(disz) u4-me u2-ba-'u-szu-ma ul in-na-mir a-szar-szu

35. si-te-et _ansze-kur-ra-mesz erin2 hi-a_-szu2 sza ia-'a-szu ma-na-ah-tum na-a-lisz ip-par-szi-du-szu-ma la il-li-ku i-da-a-szu isz-tu qe2-reb _edin_ u3 ba-ma-a-ti isz-te-nisz u2-pa-hir

36. i-na me-te-eq ger-ri-ia {iri}a-ma-tu {iri}ha-u2-a-e {iri}su-pa-pu {iri}nu-qa-bu {iri}e2-sa-an-na-bi {iri}qu-da-a-a-in

37. {iri}kid-ri-na {iri}bad3-{disz}la-di-ni {iri}bi-ta-a-ti {iri}ba-ni-tu {kur}gu-zu-um-ma-nu {iri}bad3-{disz}ia-an-s,u-ri {iri}bad3-{disz}a-bi-ia-ta-a' {iri}bad3-{disz}ru-du-um-me

38. {iri}e2-{disz}ra-he-e {iri}ha-pi-sza2 {iri}sa-di-an {iri}hu-ru-du {iri}s,a-ah-ri-na {iri}il-tu-uk {iri}al-la-al-lu marad-da{ki} {iri}ia-qi-mu-na

39. {iri}ku-up-ru-na {iri}e2-{disz}ku-dur2-ri {iri}sila-qa-{disz}ma-ru-si nap-har 3(u) 3(disz) _iri-mesz_ dan-nu-ti _e2 bad3-mesz_-ni sza _kur e2_-{disz}dak-ku-ri a-di 2(disz) _me_ 5(u) _iri-mesz tur-mesz_ sza li-me-ti-szu2-nu

40. {iri}bad3-{disz}ap-pe-e {iri}bad3-{disz}ta-ne2-e {iri}bad3-{disz}sa-ma-a' {iri}sa-ar-ra-ba-tu {iri}s,a-la-ha-tu {iri}bad3-{disz}ab-da-a-a {iri}sa-ap-pi-hi-ma-ri {iri}s,ib-tu2-sza-{iri}ma-ak-ka-me-e

41. nap-har 8(disz) _iri-mesz_ dan-nu-ti _e2 bad3-mesz_-ni sza _kur e2_-{disz}sa-'a-al-li a-di 1(disz) _me_ 2(u) _iri-mesz tur-mesz_ sza li-me-ti-szu2-nu

42. {iri}sa-pi-a {iri}sa-ar-ra-ba-nu _ud-ud-ag{ki} bara2_-mar-ri{ki} {iri}e2-{disz}dingir-ba-ni {iri}a-hu-du {iri}sza-is,-s,ur-{d}iszkur {iri}sza2-har-ra-tu2 {iri}ma-na-ah-hu

43. {iri}sza-a-me-le-e {iri}bad3-{disz}aq-qi2-ia {iri}na-gi-tu {iri}nu-ur-a-bi-nu {iri}ha-ar-s,u-ar-ra {iri}bad3-{disz}ru-uk-bi {iri}da-an-da-hul-la {iri}bad3-{disz}bir-da-da

44. {iri}e2-re-'e-e {iri}bad3-{disz}u2-gur-ri {iri}hi-in-da-i-na {iri}bad3-{disz}u2-a-a-it {iri}e2-{disz}ta-u2-ra-a {iri}sa-ap-hu-na {iri}bu-ha-ar-ru

45. {iri}har-bat-{disz}szum2-na {iri}har-bat-{disz}kal-bi {iri}sza2-bar-re-e {iri}e2-{disz}ba-ni-dingir-u2-a {iri}su-la-a-du {iri}e2-{disz}il-ta-ma-sa-ma-'a {iri}e2-{disz}di-ni-dingir

46. {iri}da-qa-la {iri}ha-me-za {iri}be-la-a {iri}ta-i-ru {iri}kip-ra-a-nu {iri}il-ta-ra-tu2 {iri}aq-qar-sza2-ki-na {iri}sa-ga-ba-tu2-sza-{disz}mar-duk-ia

47. nap-har 3(u) 9(disz) _iri-mesz_ dan-nu-ti sza _kur e2_-{disz}a-muk-ka-a-ni a-di 3(disz) _me_ 5(u) _iri-mesz tur-mesz_ sza li-me-ti-szu2-nu

48. {iri}e2-{disz}za-bi-di-ia ararma{ki} kul-aba4{ki} eridu{ki} ki-is-sik{ki} {iri}ne2-med-{d}la-gu-da {iri}bad3-{disz}ia-ki-ni a-di {iri}kar-{d}ag sza2 ki-szad {i7}mar-ra-ti

49. nap-har 8(disz) _iri-mesz_ dan-nu-ti _e2 bad3-mesz_-ni sza _kur e2_-{disz}ia-ki-ni a-di 1(disz) _me iri-mesz tur-mesz_ sza li-me-ti-szu2-nu

50. nap-har 1(gesz2) 2(u) 8(disz) _iri-me_-ni dan-nu-ti _e2 bad3-mesz_-ni sza {kur}kal-di a-di 8(disz) _me_ 2(u) _iri-[x] tur-mesz_ sza li-me-ti-szu2-nu al-me ak-szu-ud asz2-lu-la szal-la-su-un

51. _sze-im zu2-lum-ma_ sza qe2-reb ki-ra-a-te-szu2-nu _buru14_-szu2-nu sza _edin erim#-hi#-a#_-ni# u2-sza2-kil ap-pul aq-qur i-na {d}gesz-bar aq#-mu a-na _du6-mesz_ ma-szu-u2-ti u2-ter

52. {lu2}ur2-bi {lu2}a-ra-mu {lu2}kal-du sza qe2-reb unu{ki} nibru{ki} kisz#{ki} hur-sag-kalam-ma{ki} a-di _dumu-mesz iri en#_ [x x]-t,i u2-sze-s,a-am-ma szal-la-ti-isz am-nu

53. _sze-im zu2-lum-ma_ sza qe2-reb ki-ra-a-te-szu2-nu me-resz ma-na-hi-szu2-nu _buru14 edin_ ba-lat, na#-pisz#-[x x]-nu# _erin2 hi-a_-ni u2-sza2-kil

54. {disz}en-du3 _dumu {lu2}gal-du3_ pe-re-'i szu-an-na{ki} sza2 ki-ma mi-ra-ni s,a-ah-ri qe2-reb _e2-gal_-ia ir-bu-u2 [...]{ki#} u3# uri#{ki} asz2-ta-kan _ugu_-szu2-un

55. i-na ta-a-a-ar-ti-ia {lu2}tu-'u-mu-na {lu2}ri-hi-hu {lu2}ia-daq-qu {lu2}u2-bu-du {lu2}gib-re-[...]-bu#-lu# {lu2}da-mu-nu {lu2}gam-bu-lum {lu2}hi-in-da-ru

56. {lu2#}ru#-'u#-u#-a# {lu2}pu-qu-du {lu2}ha-am-ra-a-nu {lu2}ha-ga#-ra-a-nu {lu2}na-ba-tu {lu2}li#-[x]-ta-a-[...]-risz ak-szud{ud}-ma asz2-lu-la szal-la-su-un

57. i-na me-ti-iq ger-ri-ia sza {disz}{d}ag-en-mu-mesz [x] qi#-pi {iri}ha-ra-ra-ti _ku3-sig17 ku3-babbar_ {gesz}mu-[...] _gal#-mesz ansze-[x x]-gam-mal-mesz gu4-mesz_ u3 _u8-udu hi-a_ man-da-ta-szu2 ka-bit-tu2 am-[x]

58. ba-hu-la-te {iri}hi-rim-me _{lu2}kur2_ ak-s,u sza ul-tu ul-la a-na _lugal-mesz_-ni _ad-mesz_-ia la ik-nu-szu# i#-na# _{gesz}tukul_ u2-szam-qit-ma na-pisz-tum ul e-zib

59. na#-gu-u2 szu-a-tu a-na esz-szu-ti as,-bat 1(disz)-en _gu4_ 1(u) _udu-mesz_ 1(u) _ansze gesztin-mesz_ 2(u) _ansze zu2-lum-ma_ re-sze-te-szu2 a-na gi-ne2-e _dingir-mesz kur_ asz-szur{ki} _en-mesz_-ia u2-kin da3-ri-szam

60. it-ti 2(disz) _me_ 8(disz) _lim_ szal-lat _ug3-mesz_ ka-bit-tum 7(disz) _lim_ 2(disz) _me ansze-kur-ra-mesz {ansze}kunga-mesz_ 1(u) 1(disz) _lim_ 1(gesz2) 1(u) 3(disz) _ansze-mesz_ 5(disz) _lim_ 2(disz) _me_ 3(u) _{ansze}gam-mal-mesz_ 1(gesz2) 2(u) _lim_ 5(u) _gu4-mesz_ 8(disz) _me lim_ 1(disz) _me u8-udu hi-a_ szal-mesz a-tu-ra a-na qe2-reb _kur_ asz-szur{ki}

61. e-zib _ug3-mesz ansze-mesz {ansze}gam-mal-mesz gu4-mesz_ u3 _u8-udu hi-a_ sza [x]-mir# _erin2 hi-a_-ia e-bu-ku-nim-ma a-na ra-ma-ni-szu2-nu is-ki-lu si-kil-tu

62. u3 ba-hu-la-te na-ki-ri szep-s,u mit-ru sza a-[x x]-ri-ia la ik-nu-szu i-na _{gesz}tukul_ u2-szam-qit-ma a-lul ga-szi-szisz

63. i-na u4-mi-szu-ma nina{ki} ma-ha-zu s,i#-i#-ru# _iri_ na-ram# {d}isz-tar sza nap-har ki-du-de-e _dingir-mesz_ u3 _{d}isz-tar-mesz_ ba-szu-u2 qe2-reb-szu

64. tem-me-en-nu da-ru-u2 du-ru-usz s,a#-[x]-ti# sza# ul-tu ul#-la it-ti szi-t,ir bu-ru-um-me es,-rat-su es,-ret-ma szu-pu-u2 s,i-in-du-szu

65. asz2-ru nak-lu szu-bat pi-risz-ti sza2 mim-ma# szum#-szu2 szi-pir ni-kil-tim gi-mir pel-lu-de-e ni-s,ir-ti lal3-gar szu-ta-bu-lu qe2-reb-szu

66. sza ul-tu ul-la _lugal-mesz_-ni a#-li#-kut mah-ri _ad-mesz_-ia ul-la-nu-u-a be-lu-ut _kur_ asz-szur{ki} e-pu-szu-ma u2-ma-'e-ru ba-'u-lat {d}en-lil2

67. u3 szat-ti-szam la na-par-ka-a e#-reb la nar-ba-a-ti _gun_ mal-ki kib-rat ar-ba-'i im-da-na-ha-ru qe2-reb-szu

68. a-a-um-ma i-na lib3-bi-szu2-nu a-na _e2-gal_ qer-bi-szu kum2-mu ri-mit be-lu-tu2 sza s,u-hur szu-bat-su le-e-su ul id-da-a lib3-bu-usz ul ih-su-us

69. a-na szu-te-szur _sila iri_ u3 szum-dul re-ba-a-ti ha-re-e _i7_ za-qa-ap s,ip-pa-a-te u2-zu-un-szu2 ul ib-szi-ma ul usz-ta-bil ka-ras-su

70. ia-a-ti {disz}{d}en-zu-szesz-mesz-eri-ba _lugal kur_ asz-szur{ki} e-pesz szip-ri szu-a-tu ki-i t,e3-em _dingir-mesz_ i-na uz-ni-ia ib-szi-ma ka-bat-ti ub-lam-ma

71. te-ne-szet [x] kal#-di {lu2}a-ra-mu {kur}man-na-a-a {kur}qu-e u3 {kur}hi-lak-ku sza2 a-na ni-ri-ia la kit-nu-szu2 as-su-ha-am-ma tup-szik-ku u2-sza2-asz2-szi-szu2-nu-ti-ma il-bi-nu _sig4_

72. a-pe ku-pe-[x x] qe2-reb {kur}kal-di ak-szit,-ma ap-pa-ri-szu2-un szam-hu-ti i-na ba-hu-la-ti na-ki-ri ki-szit-ti _szu-min_-ia u2-szal-di-da a-na e-pesz szip-ri-sza2

73. _e2-gal_ mah-[x]-tu# sza 3(u) _ninda_ szid#-du u3 1(u) _ninda sag-ki_-sa sza _lugal-mesz_-ni a-li-kut pa-ni _ad-mesz_-ia u2-sze-pi-szu-ma la u2-nak-ki-lu szi-pir-sza2

74. sza ul-tu [...]-qu#-ti {i7}te-bil-ti i-ta-a-sza2 i-ba-'u-ma i-na usz-szi-sza2 ab-bu u2-szab-szu-u2 u2-ri-ib-bu tem-me-en-sza2

75. _e2#-gal#-tur#_ [...] a#-na# si-hir-ti-sza2 aq-qur-ma sza {i7}te-bil-ti ma-lak-sza2 usz-t,ib-ma u2-sze-szir mu-s,u-sza2

76. i#-na# [x] sze-[...] u4-mi mit-ga-ri qe2-reb ka-tim-ti a-sur-rak-ki-sza2 1(disz) _usz_ szid-du 3(u) 4(disz) _sag-ki na4 kur_-i dan-nu ak-si-ma _a-sza3_ ul-tu ma-a-me u2-sze-lam-ma na-ba-lisz u2-sze-me

77. la#-ba#-risz# u4#-me# i-na _illu_ kisz-sza2-ti te-me-en-szu la e-ne2-szi as-kup-pat {na4}pi-i-li rab-ba-a-ti a-sur-ru-szu2 u2-sza2-as-hi-ra u2-dan-<ni>-na szu-pu-uk-szu2

78. 2(disz) _usz_ 4(u) ti-ib-ki s,e-ru-usz-szin a-na e-la-ni tam-la-a u2-mal-li-ma e-li mi-szi-ih-ti _e2-gal_ mah-ri-te u2-rad-di-ma u2-sza2-an-di-la ti-sar-sza2

79. _e2-gal zu2 am-si {gesz}esi {gesz}tug2_ {gesz}mu-suk-kan-ni# _{gesz}eren# {gesz}szur-min3_ {gesz}{szim}_li_ u3 {gesz}bu-ut,-ni e2-gal-za3-du-nu-tuku-a a-na mu-szab _lugal_-ti-ia u2-sze-pi-sza2 qe2#-reb#-sza2

80. _gesz-ur3-mesz {gesz}eren_ tar-bit {kur}ha-ma-nim sza ul-tu hur#-sza2#-a#-ni# ru#-qu#-u2-ti nam-ra-s,i-isz ib-bab#-lu-ni u2-szat-ri-s,a ta-ra-an-szi-in

81. _{gesz}ig-me {gesz}szur-min3_ s,i-ra-a-ti sza i-na pe-te-e u3# ta-a-ri e-re-sin t,a-a-bu me-ser2 _zabar_ nam-ri u2-rak-kis-ma u2-rat-ta-a ba-bi-szin

82. _e2_ ap-pa-a-te tam-szil _e2-gal_ {kur}hat-ti sza i-na li#-sza2-a-ni# _kur mar-tu{ki} e2_ hi-la-a-ni i-sza2-as-su-szu2 a-na mul-ta-'u-u-ti be-lu-ti-ia u2-sze-pi-sza2 qe2-reb-szin

83. 8(disz)# _ur#-mah#-mesz#_ pe-tan bir#-ki# szu-ta-tu#-ti sza i#-na# 3(szar2) 1(gesz'u) _gun uruda_ nam-ru pi-ti-iq {d}nin-a2-gal szu-pu-szu ma-lu-u2 nam-ri-ri

84. u3# 2(disz)# tim#-me# szu#-ta-hu-ti sza 1(szar2) 4(gesz'u) _gun_ pi-ti-iq si-par-ri szu-ub-bu-'u a-di 2(disz) tim-me _{gesz}eren gal-mesz ugu#_ pirig3-gal-le-e u2-kin-ma dap2-pi ku-lul _ka2_-szi-in e-mid

85. er#-bet# _udu#_ szad#-di# _{d}lamma#_ sza# _ku3#-babbar_ si-par-ri it-ti _udu_ szad-di _{d}lamma_ sza _na4 kur_-i esz-qi2 nak-lisz ab-ni-ma a-na er-bet-ti sza2-a-ri u2-sza2-as,-bi-ta _si-gar_-szi-in as-mu

86. as#-kup#-[x x] pi#-i-li rab-ba-a-ti da-ad2-me na-ki-ri ki-szit-ti _szu-min_-ia qe2-reb-szi-in es-si-ha# a-sur-ru-szi-in u2-sza2-as-hi-ra a-na tab-ra-a-ti u2-sza2-lik

87. _{gesz}kiri6#-mah#_-hu# tam#-szil# {kur}ha-ma-nim sza gi-mir _szim hi-a-mesz gurun_ s,ip-pa-a-te _gesz-mesz_ tuk-lat sza2-di-i u3 {kur}kal-di qe2-reb-szu2 hur-ru-szu i-ta-a-sza2 az-qu-up

88. asz2#-szu# za-qa#-ap# s,ip-pa-a#-[x] _a-sza3_ ta-mir-ti e-le-en _iri 2(barig)-ta-am3_ a-na _dumu-mesz_ nina{ki} pil-ku u2-pal-lik-ma u2-szad-gi-la pa-nu-usz-szu2-un

89. a#-na# mit,-ra#-a#-ti szum-mu-hi ul-tu pa-a-t,i {iri}ki-si-ri a-di ta-mir-ti _nina{ki} kur_-a u3 bi-ru-tu2 i-na ak-kul-la-te _an-bar_ u2-szat-tir-ma u2-sze-szir {i7}har-ru

90. [x x] _danna2#_ [x]-qa-ru ul-tu qe2-reb {i7}hu-su-ur ma-a-me da-ru-u2-ti a-szar-sza2 u2-szar-da-a qe2-reb s,ip-pa-a-te sza2-ti-na u2-szah-bi-ba pat-ti-isz

91. ul#-tu# szip#-ru# _e2-gal_ be-lu-ti-ia u2-qat-tu-u2 u2-sza2-an-di-la re-ba-a-ti bi-re-e-ti su-qa-a-ni usz-par-du-ma u2-nam-mir _gin7_ u4-me

92. {d#}asz#-szur# _en# gal#_-u2# _dingir-mesz_ u3 _{d}isz-tar-mesz_ a-szi-bu-ut _kur_ asz-szur{ki} i-na qer-bi-sza2 aq-re-ma _{udu}siskur-mesz_ tasz-ri-ih-ti aq-qi2-ma u2-szat-lim kad3-ra#-a-a

93. a#-na# ar2-kat3 u4-me i-na _lugal-mesz_-ni _dumu-mesz_-ia sza {d}asz-szur a-na _re-e2-[x_ x] _kur#_ u3# _ug3-mesz_ i-nam-bu-u2 zi-kir-szu2 e-nu-ma _e2-gal_ sza2-a-tu i-lab-bi-ru-ma [x]-na-hu

94. an-hu-sa lu-ud-disz _mu-sar_-e szi-t,ir szu-me-ia li-mur-ma _i3-gesz_ lip-[x x] {udu#}_siskur_ liq-qi2 a-na asz2-ri-szu2 li-ter {d}asz-szur ik-ri-bi-szu2 i#-szem-me

single ruling

95. _1(disz) usz 3(u) 4(disz)-ta-am3 mu szid mu-sar_-e

Source :

https://cdli.ucla.edu/search/
search_results.php?SearchMode
=Text&requestFrom=Search&
TextSearch={d}za-ba4-ba4